Norabona pola victoria nes elecciones al Rectoráu. Como nuevu rector de la Universidá d'Uviéu, ¿qué planes inmediatos tien?

Munches gracies. Los mios planes nesti momentu céntrense na confección del mio equipu. Toi trabayando nello pa que'l llunes tea formáu, yá cuasi con tolos directores d'área. El día 8 tomo posesión y el 9 los vicerrectores. El 12 empezaremos a trabayar. El retu de la converxencia europea ta ehí y tenemos qu'aplicanos bien.

¿Puede adelantanos dalgún aspectu del equipu que ta formando?
¿De nomes? Non, nun puedo tovía. Toi formándolu. La verdá ye que tengo muncho onde escoyer y nun quiero mancar sensibilidaes. El llunes doi tolos nomes.

Hai un tema qu'interesa muncho a los llectores de LES NOTICIES DIXITAL. ¿Qué posición va tener la llingua asturiana na Universidá d'Uviéu?
Yá hai cuatro años firmé un manifiestu de diez puntos nel que me comprometía a potenciar la llingua asturiana. Cuido qu'esi manifiestu sigue siendo válidu. Falé con representantes de delles asociaciones y di-yos la confianza de que voi a potenciar tolo que sía la investigación sobre la llingua asturiana. Esto, amás, ta por escrito. Falé d'esti tema con profesores que tán nesti campu y parezme que tienen la mio credibilidá. respective al tema tan debatíu de la Filoloxía Asturiana, soi de la opinión de que nesti momentu, cuando va haber una reforma de toles filoloxíes, lo normal será qu'esista una carrera de Teoría y Llingües Modernes. Ehí habría un Maior y un Minor, y dientro d'esa minor taría induldablemente la Filoloxía Asturiana.

No que diz respecto a la converxencia europea, a la Universidá d'Uviéu preséntense-y bien bonos retos. ¿Preparaos pa ellos?
Son munchos los retos y grandes. Queremos asitiar a la Universidá d'Uviéu na primer llinia. Dende'l Vicerrectoráu correspondiente, y cola ayuda de toos, lo que fairemos ye recopilar el trabayu que se fixo hasta agora, que foi poco, y preparar la entrada converxencia que se va producir nel 2009-2010. Vamos retrasaos y tenemos que ver cómo nos reconvertimos. Depués habrá un segundu estadiu onde miramos qué nueves tutalaciones necesita la sociedá asturiana y pondrémosles en marcha colos recursos técnicos y humanos que tengamos.

Ayeri'l sindicatu CC OO llamaba l'atención al Gobiernu asturianu pol éxodu de 19.000 mozos asturianos que nel 2007 tuvieron que marchar d'Asturies a buscar trabayu fuera. ¿La Universidá ye'l pasaporte pal emigrante o tien que ser daqué más?
La Universidá, aparte de formar a xente que puede marchar o quedar,  tien que ser un motor económicu p'Asturies. La mio idea ye trabayar colos parques tecnolóxicos de Mieres y Xixón. Podemos atraer empreses, podemos crear departamentos coles empreses. Eso ye tamién crear empléu.